＜阿母的祕密＞
選文
注釋
題解
這篇文章對「祕密」這兩字入題，描述作者細漢的時厝內散食，規家伙仔對庄跤搬去臺北拍拚的故事。頭先，做油湯的生理有趁寡錢，煞引來親情朋友欲共愛面子的老爸借錢，𪜶阿母為著無愛拍歹翁仔某的感情，偷偷仔共錢儉佇「祕密」的口座，尾仔煞成做𪜶搬轉去庄跤買地、起厝的基金，這个「祕密」共𪜶厝內的人對未來的向望，攏箍做伙矣。
作者
黃文俊，1968年出世佇嘉義縣中埔的庄跤。嘉義師專畢業、臺中師範學院國民教育研究所碩士。現此時是臺中市何厝國小教師，兼任教育部國教署中央輔導團本土語文組諮詢教師的工課。
伊佇教學的過程中感受語言傳承的重要，就栽入去閩南語創作的天地，嘛四界去推捒、鼓勵老師參加本土語言認證，同齊為母語來拍拚。
散文作品＜臭豆腐的滋味＞、＜佇海拔3275公尺頂懸喘氣＞捌得著教育部閩客語文學獎；＜生--的佮養--的＞得著《台文戰線》文學獎優等；閣有＜我又閣夢著阿母矣＞、＜阮兜的早頓＞、＜阿母的祕密＞、＜說多謝＞、＜陪阿母坐高鐵＞捌入選教育部閩南語朗讀稿。
小說＜廖董--的＞、＜廟公是『007』＞、＜光明燈＞捌得著教育部閩客語文學獎，＜股份無限公司＞、＜萬能𥴊仔店＞得著台文戰線文學獎優等、＜楊桃將軍＞得著臺南文學獎優等，2018年由島鄉台文工作室出版小說集《楊桃將軍》。
現代詩作品多數是對社會現象的觀察為主，有＜青春的代價＞、＜安養院的中晝頓＞、＜王梨的滋味＞…等幾十首，捌發表佇《台文戰線》、《臺江臺文雜誌》、《海翁台文雜誌》…等刊物。
問題與討論
1.若準是恁兜拄著𨑨迌人欲共恁討保護費，你感覺有啥物方法會當處理這个問題？
2.請問你對文章的內容想看覓，是按怎作者的兄弟姊妹會保守彼个「祕密」遐爾久？
3.若準你是作者，看著阿爸予厝內的人的瞞騙遐爾久，心內有啥物感覺？請你講看覓。
4.對文章的內容來看，你認為作者的老爸可能是一个啥物款的人，請你講看覓。
賞析
本篇文章採用時序倒反的『倒敘法』，以作者第一人稱的觀點來描寫代誌的經過。
代先，對國小三年仔開始，描寫規家伙仔去臺北拍拚拄著的困難佮開始排擔仔做生理的經過；紲咧描寫佇異鄉沓沓仔有趁著錢，煞有人欲共𪜶老爸借錢、引起爸母意見袂合的衝突；閣再來，為著無愛翁仔某為著借錢予人的代誌咧冤家，作者的老母決定欲瞞騙翁婿，偷偷仔開一个口座來儉私奇，囝兒序細嘛攏支持𪜶老母的決定；上尾，因為受𨑨迌人的壓迫，佇𪜶規家伙仔不得已愛搬轉去庄跤覕的時陣，彼本祕密的寄金簿仔煞成做𪜶兜買地、起厝的基礎。
全篇以「祕密」號名，卻是一个家庭的女主人，為著欲替規家伙仔的未來拍算，實在不得已的做法。主要的思考，徛佇「無愛翁仔某拍歹感情」，表面上是瞞騙翁婿，煞得著所有囝兒序細的支持，有「祕密」的名，顛倒毋是「祕密」，而且變成共規家伙仔箍做伙的力量。
學習單
名稱：我的寄金簿仔
1.請同學去查詢看覓，以恁猶未滿二十歲的身份，去郵局抑是銀行開戶，需要準備啥物證件佮資料？並且畫一个簡單的流程。
回答：
a. 未滿二十歲需要準備的證件佮資料：
b.流程說明：
2.若準恁已經滿二十歲矣，去郵局抑是銀行開戶，需要準備啥物證件佮資料？佮未成年開戶有啥物差別，請講看覓。
回答： a.年滿二十歲需要準備的證件佮資料：
b.佮未成年開戶的差別：
3.根據以上兩題，請恁以3~4个同學討論看覓，為啥物未滿二十歲佮 滿二十歲的人欲開戶，需要準備的證件佮資料無仝款？請講出恁的看法。
回答