古雅的恆春，因為宋澤萊這首＜若是到恆春＞，規个城攏青春起來矣。

     ＜若是到恆春＞這首詩收錄佇《福爾摩莎頌歌》。恆春倚山靠海，本來是臺灣一个誠平凡的小鄉鎮，毋過，佇詩人的眼中，恆春的山崙若是拄著罩霧，看起來就親像「姑娘的溫純」；黃昏時，海邊仔逐工攏會出現的晚雲，嘛親像姑娘仔咧抹粉。按呢的描寫，就使人足好奇的，足想欲去看覓仔—「恆春」到底是一个啥物款的鄉鎮，哪會遮爾像一个青春美麗的姑娘？

     詩人毋但介紹恆春的山水予咱認捌，上尾仔伊閣紹介恆春民謠的代表人物「陳達」予咱熟識，陳達仔的歌若唱起，「思啊想啊起~~」，聽著的時，就會消敨咱的心悶。

     既然恆春的山佮海遮爾媠、民謠遮爾好聽，按呢咱愛啥物時陣去恆春較好？落雨的時？黃昏的時？好天的時？

     若是欲去恆春，著愛「不管時」。

      宋澤萊（1952年），本名廖偉竣，雲林縣二崙鄉人。國立臺灣師範大學歷史系學士、國立中興大學臺灣文學研究所碩士。伊的創作以小說、論述為主，嘛有寫新詩佮散文。1975年對臺灣師範大學歷史系畢業後，開始佇彰化縣福興國中教冊，嘛佇這个時陣開始創作《打牛湳村》系列的鄉土小說，成做70年代鄉土文學論戰末期，延續鄉土文學傳統的代表性作家。伊的小說有：《廢墟台灣》、《抗暴的打貓市》、《血色蝙蝠降臨的城市》、《熱帶魔界》、《變成鹽柱的作家》；詩集有《福爾摩莎頌歌》、《一枝煎匙》。

      宋澤萊誠關注臺灣本土意識佮新文化的發展，伊閣佮一寡有志做伙編寫、策劃《臺灣新文化》、《臺灣新文學》、《臺灣ｅ文藝》、《台文戰線》等刊物。

      宋澤萊捌得過吳三連文學獎、吳濁流文學獎、時報文學獎小說推薦獎、聯合報小說獎等。2011年發表《臺灣文學三百年》，2013年，獲臺灣國家文藝獎。伊是一个小說家、詩人、評論家、編輯人，嘛是推動咱臺灣本土化佮戰後臺語文學創作的重要作家。

1. 請問這首詩用相仝的句法來寫四段的內容，有啥物優點？你敢會當講看覓？

2. 這首詩敢有押韻？請你共韻跤揣出來，順紲共規首詩讀一擺，感受這首詩的音樂性、韻律感。

3. 請問你佇學習的過程中，捌讀過啥物文章抑是詩作有寫著「聲音」？會予你啥物款的感受？你佇這首內底，敢有「聽著」陳達仔的歌聲？

      一首現代詩會當四界流傳，除了內容有豐富的文學性以外，若是詩作本身音樂性懸、有韻律感，嘛會予讀者愈唸愈紲喙，愈讀愈有趣味。若閣加上文字平民化、口語化，予逐家一看就知影這首詩的主旨，就有法度將詩人的意念傳達予讀者知影，按呢這首詩作就是成功的文學作品。

      ＜若是到恆春＞就是符合頂面幾个條件，一首成功的臺語現代詩。

      這首詩是一首親像歌謠仝款的現代詩，用字自然閣口語化，每一段攏有押韻，韻跤「春、陣、崙、純、雲、粉、船、近、悶」，共遮的文字結合起來，予這首詩讀--著袂輸是咧唱歌。

      本詩分作四段。第一段描寫落雨的時，恆春的罩霧山崙，景色柔美，親像是姑娘仔的溫純。第二段描寫黃昏的時，恆春的海邊仔晚雲的景緻，袂輸是姑娘仔咧抹粉。第三段描寫好天的時，恆春的漁民出海掠魚，漁船仔有遠嘛有近，敢若是一幅畫，一幅平靜安和的風景畫。第四段，詩人將平面的風景畫轉換做立體的聲音，若是來恆春聽著陳達仔所演唱的「思想起」，心中的苦悶就會消敨了了。

      這首詩對時間寫到空間，寫風景嘛寫人文，將恆春地區的人文、音樂佮地景攏囥佇詩內底。＜若是到恆春＞，詩內面有景、有情、有人、嘛有聽著聲音，若是讀完這首詩，咱就會想講，遮爾媠的恆春好所在，不管啥物時陣攏通好去！

聽著落雨的聲音：

歌星周杰倫捌唱過一首華語歌曲：「聽見下雨的聲音」，作詞者是方文山，內底有描寫著誠濟種的「聲音」。請你將＜若是到恆春＞內底有可能出現的聲音，用漢字抑是臺羅拼音，將伊描寫出來。

附錄原作：

若是到恆春宋澤萊
　　就愛落雨的時陣
　　罩霧的山崙
　　親像姑娘的溫純

　　若是到恆春
　　愛揀黃昏的時陣
　　你看海墘的晚雲
　　半天通紅像抹粉

　　若是到恆春
　　就愛好天的時陣
　　出帆的海船
　　有時駛遠有時近

　　若是到恆春
　　嘸免揀時陣
　　陳達的歌若唱起
　　一時消阮的心悶