2020 年 的 春天 ， 袂輸 是 14 世紀 瘟疫 四界 湠 的 歐洲

為著 顧 性命 ， 逐家 自 按呢 攏 盡量 共 家己 關 咧

城 嘛 時行 封 咧 ， 甚至 國 的 邊境 嘛 鎖 咧

一直 衝碰 ² 無閒 咧 拋拋走 的 跤步 自按呢 放 慢 、 恬靜 落來

咱 嘛 才有 機會 聽著 咱 心內 的 聲

舊 的 世界 、 舊 的 價值 、 舊 的 理論 規个 攏 大 走山 ³ 去 矣

新 的 天地 、 新 的 想法 毋知 是 生 啥物 款 ？

往過 彼陣 Italy 城市 的 圍牆 是 遐爾 懸 、 遐爾 勇 、 遐爾 厚

有 法度 擋住 任何 火砲 的 攻擊 ， 毋過 按呢 敢 就會 保障 𪜶 的 安全 ？

毋知影 對 當時 開始 ， 佮 親近 的 人 手牽手

按呢 相攬 相唚 ， 煞 袂輸 是 邀請 死神 來 跳 最後 的 『 Tango ⁴ 』 ？

一下 講 再會 了 ， 嘛 毋知影 底時 ⁵ 會 閣再 相會

遐爾 濟 熟似 的 人影 ， 古錐 的 肉文笑 ⁶ 攏 猶未 相辭 咧

死神 毋知 底時 雄雄 就 現面 ， 隨 共 𪜶 攏 掠去 藏

煞 予人 心內 一直 起 憢疑 ： 穿 媠媠 ， 抹 芳芳

人𤲍人 的 繁華 ， 敢講 攏是 誘拐 予人 穢著病 自按呢 死去

一張 上 jio-toh ⁷ 的 包裝紙

予人 囂俳 ⁸ 的 金錢 、 權勢 、 地位

佇 死神 的 面頭前 ， 欲 哪 有較縒 ⁹ 啦

本來 市街 的 人 一直 是 按呢 挨挨陣陣 ， 鬧熱滾滾

睏 一 醒 精神 起來 爾 ， 彼款 著人災 ¹⁰ 的 恐怖 佮 驚惶

自按呢 攏 予人 放捒 現 空城

性命 是 遐爾 軟汫 ， 大風 一下 來 隨時 吹 化去 ¹² ， 最後 猶會 記得 啥

彼陣 十个 少年家 疏開 ¹³ 去 庄跤 ， 足 無聊 的 時

𪜶 用 Tuscan ¹⁴ 上 親切 的 話 來 講古 ， 逐工 予 無仝 人 輪流 來 做 莊官 ¹⁵

無論 是 偌 譀 、 偌 古錐 、 偌 笑詼 ， 總是 予人 一點仔 溫暖

佇 彼个 讀冊人 攏 干焦 知影 拉丁文 的 時代

𪜶 的 聲音 予人 記 落來 矣 ， 敢 有人 知影 𪜶 是 咧 笑啥貨

是 咧 煩惱 啥代 ？ 彼陣 少年家 嘛 毋知影 講

𪜶 的 形影 無意中 予 小說家 寫 落來

小說家 覆 佇 桌頂 那 寫 那 笑 的 時 ， 嘛 毋知影 講 彼是 現代 Italy文 的 開始

甚至 幾若 世紀 以後 的 人 共 伊 彼个 時代 號做 文藝復興

遐的 話鬚仔 拍算 ¹⁶ 藏 佇 玻璃矸仔

遐 的 笑聲 、 吐大氣 的 聲 自按呢 予 伊 佇 茫茫 的 大海 沐沐泅 ¹⁷

嘛 毋知 欲 流 偌遠 、 等 偌久 ， 才 予人 抾著